Gumshem Myen hpyen hpung ni hpe KIA hpyen hpung ni Bawm hte hkap kapaw bun
Uru Ginwang Ginjaw, Masat (9) Dap Ba, Masat (6) Dap Dung ginra, Maw Shan hte Seng Awng lapran kaw KIA hpyen hpung ni bawm hkap kapaw ai majaw lagaw lam yu wa ai Myen hpyen dap ni hkala nba hkrum hkra ai lam nga ai re hpe Salang langai tsun dan ai kaw nna chye lu ai.
July shata praw 7 ya jahpawt hkying 7:10am aten hta Kataing Bum kaw nna lagaw lam hte yu wa ai HK.L.Y (42) hte (116) pawng hpawm hpyen n-gun (70) daram hpe KIA hpyen hpung ni kawn bawm hkap kapaw ai re.
“Myen hpyen dap maga gaw marai (5) daram galau mat ai. Hkala nba hkrum ai masha mung law ai majaw mawdaw (3) hte Hpakant tsi rung de htaw shalai sa wa masai” nga nna Salang wa tsun dan ai.
Mungji Ginwang hta mung Gumshem Myen hpyen dap Hk.M.Y (419) hte (547) pawng hpawm hpyen hpung n-gun (100) daram nga ai Hpawng Seng Myen hpyen dap hpe hkying 8:20am aten laman hta MNDAA Dap Ba (311) hpyen hpung ni sa htim gap ai lam nga ai re hpe matut chye lu ai.
