COVID-19 ana zinli kap ai machyi masha law wa ai majaw mung mare masha ni grai hkrit tsang nga
Mungdan shara shagu de numdaw (3) lang ngu na bai kap bra sawng wa ai COVID-19 ana zinli gaw Man Maw, Man Je Muklum kata hta mung ana zinli kap ai machyi masha grau law jat wa ai majaw ana kap bra sawng wa na hpe mungshawa ni grai hkrit tsang nga ai lam chye lu ai.
Gumshem Myen hpyen Asuya kawn ana makawp maga lam hte seng nna tau hkyen lajang ai lam, lit la tsi gawn lajang ai lam n galaw ai sha n-ga, ana jep chyoi hkam ai wa gaw jep chyoi manu gumhpraw kyats 10000 mi jaw nna jep chyoi hkam la ra ai lam, Man Je mare na salang langai tsun dan ai.
Ya ten Man Je Muklum kata COVID-19 ana jep mu lu ai machyi masha yawng marai 30 jan nga sai rai nna, ana jep mu lu ai machyi masha ni hpe tsi rung tsi gawk hkan tsi tsi gawn lajang ai lam n galaw ai sha, ana jep chyoi ngut ai hpang tinang dum n-ta de bai wa shangun ai lam chye lu ai.
Man Je kaw nna Man Maw Muklum de jawng sa lung ai jawngma ni hta mung COVID-19 ana jep mu lu ai majaw, Asuya kawn jawng npat ya ai raitim, jawngma ni jawng kadai nsa lung mat ai majaw jawng nkau pat kau sai rai nna, Man Je Muklum kata mungshawa htinggaw 1600 daram shanu shingbyi nga ai lam chye lu ai.
