Shwi Nyawng Pyin Gumshem Myen Hpyen Dap hpe KIA ni sa gap

Waimaw Shwi Nyawng Pyin mare kaw dap jung shara la nga ai Gumshem Myen Hpyen Dap, Hk.M.Y (321) dap hpe July shata praw 8 ya shana 8:08pm aten KIA Dap Dung (3) hpyen hpung ni sa gap gasat ai lam chye lu ai.

KIA hpyen hpung ni gaw Gumshem Myen Hpyen Dap hpe sinat kaba hte sa gap bun ai rai nna, Gumshem Myen Hpyen Dap kawn sinat kaji kaba hte minutes (30) daram bai nhtang gap bun ai lam, shawng lam na lit nga ai salang ni kaw na chye lu ai.

Gumshem Myen hpyen hpung ni gaw KIA ni nga ginra de shamu shamawt htu shadut ai lam dingyang galaw nga ai sha n-ga, mungshawa masha ni hpe mung mara kata hkan rim zing ai lam galaw nga ai majaw, Jinghpaw Mung hte Mungmyit Sinli Ga ginra ni hta KIA hte Gumshem Myen Hpyen Dap ni gasat gala majan matut byin nga ai re.