Gumshem Myen Hpyen Dap hpe KIA ni sa htim gap
Waimaw Awng Mye Tit mahkrai kaw shara jahkrat nga ai Gumshem Myen Hpyen Dap hpe July shata 11 ya shana hkying 8:00pm aten hta KIA Masat (3) Dap Dung hpyen hpung ni sa htim gap gasat ai lam chye lu ai.
Shana hkying 9:25pm aten hta KIA Masat (3) Dap Dung ginra kaw shara jahkrat nga ai Gumshem Myen Hpyen Dap, Hk.L.Y (58) dap ni, Nang Zaw Yang maga de laknak kaba 105mm hte (2) lang gap bun ai lam nga ai.
Daw Hpum Yang makau Hkang Kai Bum kaw dap jung shara jahkrat nga ai Hk.L.Y (142) dap hte Hk.M.Y (387) Gumshem Myen Hpyen Dap ni kawn mung shana 9:45pm aten hta KIA Masat (19) Dap Dung, Masat (25) Dap Dung, hte Masat (30) Dap Dung ginra de laknak kaba (15) lang gap bun ai lam, shawng lam na lit nga ai salang ni kaw na chye lu ai
July shata 11 ya shani hta mung, Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Munggu Ginwang, Hpawng Seng mare makau Udang bum grup yin hta Gumshem Myen Hpyen Dap hte Ko Kang (MNDAA) hpyen hpung ni gasat gala majan byin ai lam chye lu ai.
