Modo, Cycle gawn hkang tara sharin wunkat yu hpawng galaw

Ginjaw Balik Dap kaw nna hpaw sharin ya ai Masat yan (1) Modo, Cycle gawn hkang tara sharin wunkat yu hpawng hpe July shata 17 ya jahpawt 8:00am aten Ginjaw Balik Dap Rung kaw galaw ai lam chye lu ai.

KIO uphkang ginra kata, Laiza grup yin hta accident manghkang jahkring hkring byin ai majaw, mungchying mungshawa hte ramma ni yawng Modo, Cycle gawn hkang tara hpe gara hku hkan nang hkan sa ra ai ngu lam ni hpe ahkyak madung shatai let wunkat hpaw sharin ai re lam, Du Kaba Lagang Tu Ring (Ginjaw Balik Dap Jawng Sharin Shalat Du) tsun ai.

Modo, Cycle gawn hkang tara hte seng nna mungchying mungshawa yawng hpe chye na hkawn hkrang hkra tsun sharin achyin ya lu ai rai yang, Laiza grup yin hta accident manghkang yawm wa lu na re ngu myit mada hkam hpa ai lam, Du Kaba matut tsun ai.

Wunkat hpe July shata praw (2) ya shani kaw nna July shata (16) ya shani du hkra hpaw sharin ai hta, Modo, Cycle gawn hkang tara hte seng ai lam, Balik hte seng ai lam, kaga chye ging chye mai ai hpaji ni hpe mung sharin achyin ya ai lam chye lu ai.

Modo, Cycle gawn hkang tara sharin wunkat hta Je Yang hpyen yen dabang, Hpun Lum Yang hpyen yen dabang hte Maga Yang hpyen yen dabang hkan na ramma ni yawng marai 26 sa du sharin hkam la ai rai nna, wunkat hpe dai ning numbat (1) lang hpaw sharin ai re lam chye lu ai.