Mai Ja Yang Muklum kata COVID-19 ana kap ai masha bai jep mu
Sinpraw Ginwang Ginjaw, Mai Ja Yang Muklum kata hta July shata 18 ya shani hte July shata 19 ya shani lahkawng ya laman, COVID-19 ana jep mu lu ai masha marai (104) bai jat wa ai lam, Sinpraw Ginwang Ginjaw COVID-19 Ana Zinli Makawp Ninghkap Komiti kaw na chye lu ai.
Mai Ja Yang Muklum kata hta mare lawk shagu lockdown galaw nhtawm, Muklum kata nga ai mungshawa yawng hpe COVID-19 ana jep chyoi ai hta, ya aten COVID-19 ana jep mu lu ai masha yawng marai (300) jan nga ai rai nna, marai (58) gaw Negative rai sai majaw laksan shara htawt nna tsi tsi gawn lajang nga ai lam chye lu ai.
Ginjaw Hkamja Dap kaw na Tsi Sarawun ni hte ap nawng Tsi Sarawun marai (23), Lung Chawn Ginwang Red-Cross hpung ni hte Sinpraw Ginwang ginjaw kata na Tsi magam gun ni rau ta gin dun nna, lockdown galaw da ai shara ni hta hpaji jaw, ningmu jahpaw ai lam, tsi gawn lajang ai lam ni galaw nga dingyang re hpe mung chye lu ai.
Laiza Muklum hta gaw masha law law nga ai Magam Dap, Makan dap, hpaji jawng, rung ni, gat dut shawa ni hte hpyen yen dabang ni hkan Swab jep ai lam galaw ai hta ana kap ai masha nnga ai raitim, Mai Sak Pa kaw Quarantine hkamla nga ai ni kaw na marai (6) hpe ana jep mu lu ai majaw, ya aten Munglai Hkyet kaw tsi tsi gawn lajang nga ai lam chye lu ai.
Laiza Muklum kaw na COVID-19 ana zinli makawp maga tsi n htu shi ai ni hpe gaw July shata (19) ya shani kaw nna Numri Pan tsi jaw gawk kaw COVID-19 ana makawp maga tsi htu ya nga sai lam, Alen Bum hpaji jawng hta mung July shata (19) ya shani ana makawp maga tsi garai nhtu shi ai jawngma marai 164 hpe ana makawp maga tsi htu ya ai lam chye lu ai.
COVID-19 ana zinli gaw hkrang nsam galai ai hte lawan dik ai hku chyam bra wa nga ai majaw, Ginjaw Ginra Ginwang Ginjaw hte Sinpraw Ginwang Ginjaw kata lai wa sai bat mi masha hpawng chyawm hpawng de ai lam pat hkum da ai hta, July shata (18) ya shani kaw nna numdaw kalang mi bai hkum pat jat dat ai lam, Ginjaw COVID-19 Ana Zinli Makawp Ninghkap Komiti kaw na ndau da ai re hpe mu chye lu ai.
