KIA ni hkam tawn ai bawm, Myen hpyen ni kapaw la nna laknak kaba hte hkrup mara gap bun
Ginjaw Ginra, Hpun Pyen Bum kaw shara jahkrat nga ai Gumshem Myen hpyen ni gaw shingan de shamu shamawt hkawm ai kaw KIA ni hkam tawn ai bawm kapaw la nna Gumshem Myen Hpyen Dap kawn July shata 23 ya shana hkying 6:52pm aten kaw nna hkying 8:25pm aten du hkra grup yin shara shagu de laknak kaba hkrup mara gap bun ai lam chye lu ai.
Bawm kapaw la ai hpang, Hpun Pyen Bum kaw nga ai Myen hpyen ni N-gaw kawng maga de 60mm (6) lang, Hkang Kai Bum kaw nga ai Myen hpyen ni Shang Htung Bum maga de 105mm (6) lang, Bumre Bum kaw nga ai ni mung Laiza makau de laknak kaba (3) lang gap bun ai lam, shawng lam na lit nga ai salang ni shana wa ai.
July shata (23) ya shana daw hkying 1:24pm aten daram hta KIA Masat (3) Dap Ba, Masat (15) Dap Dung ginra, Hka Wan Bang maga kawn hpyen Modo langai hte Cycle (5) hta jawn lung wa ai Gumshem Myen hpyen hpung ni hpe Alen Kawng mare makau kaw KIA hpyen hpung ni bawm hte hkap kapaw bun ai lam chye lu ai.
Mungmyit Sinli Ga (Kachin Sub-state) ginra hta mung, July shata 23 ya shana hkying 7:20pm aten kaw nna hkying 7:35pm aten laman, Hpai Kawng mare hku nna lagaw lam hte pru wa ai Hk.M.Y (419) dap na hpyen n-gun (40) daram hpung ni hpe Kokang MNDAA hpyen hpung ni Kawng Wai lam numshe kaw hkap gap ai kawn gasat gala majan byin ai lam chye lu ai.
