Loi Wing Bum kaw KIA hte Gumshem Myen hpyen hpung ni gasat gala majan byin
Mungmyit Sinli Ga (Kachin Sub-state), KIA Masat (10) Dap Ba, Masat (2) Dap Dung ginra, Loi Wing Bum kaw July shata 26 ya jahpawt hkying 7:18am aten kaw nna hkying 9:00am aten du hkra KIA hpyen hpung ni hte Gumshem Myen hpyen hpung ni gasat gala majan byin ai lam chye lu ai.
Gumshem Myen Hpyen Dap, Hk.M.Y (109), Hk.M.Y (518) dap na pawnghpam hpyen n-gun (230) hpung ni gaw, KIA ni nga ai ginra de htu shadut lung wa ai majaw, KIA hpyen hpung ni hkap shingla gasat dat ai kawn gasat gala majan byin ai. Tamunye Gumshem Myen Hpyen Dap, Hk.L.Y (290) dap kawn mung gasat gala majan byin ai shara de laknak kaba (105)mm hte (12) lang gap bun ai lam, shawng lam na lit nga ai salang ni shana wa ai.
July shata 24 ya shani hta mung, hkying 10:00am aten kaw nna hkying 11:00am aten hta KIA Masat (17) Dap Dung ginra, Pang Ti maga kawn pru wa ai Tatma (99) kata na hpyen n-gun (70) daram hpung ni hte KIA hpyen hpung ni Kawng Dap kaw gasat gala majan byin ai.
KIA Masat (6) Dap Ba ginra, Munggu Ginwang, Man Ping hte Nawng Hpai lapran hta mung, July shata 26 ya shani hkying 11:30am aten kaw nna hkying 2:00pm aten du hkra Gumshem Myen Hpyen Dap hte Kokang MNDAA hpyen hpung ni gasat gala majan byin ai lam chye lu ai.
