Ana zinli a majaw lockdown masat da ai ten gun rai manu sharawt na dut sha ai gat seng ni hpe gat dut ahkang pat hkum na

Laiza Muklum Woi Chyai hpyen yen dabang hte Je Yang hpyen yen dabang hta COVID-19 ana zinli jep mu lu ai majaw, mare lawk hpyen yen dabang ni hpe masha pru shang pat hkum (lockdown) masat da ai aten, shawoi na hta gun rai manu sharawt nna dut sha ai gat seng ni hpe Muklum Municipal kawn gat seng dut na ahkaw ahkang pat hkum kau ya na re lam chye lu ai.

“Lockdown aten hta gun rai manu ma ja nlung wa na matu gun rai dut ai gat seng ni hpe chye na shangun da ai lam nga sai. Ya ten gaw Muklum mare kaba de mung seng ni pat ai lam nga ai, Miwa hkran na mung gun rai n jashawn ai re majaw, gun rai ni taw wa ai raitim, ana byin nga ai aten ladaw hta ahkaw ahkang la nna shawoi manu hta dawn jan hkra manu sharawt dut ai lam nbyin hkra gat seng dut ai ni hpe tara langai mi hku madat mara na matu tsun da ai lam nga ai” nga nna Muklum Municipal Du, Salang Kaba Nhkum Lum Tu tsun ai.

Pru/shang pat hkum masat tawn da ai mare lawk hpyen yen dabang kata na mungshawa ni hte magam gun dinghku n-ta masha ni gaw, tinang lang ra ai arung arai, ra ai malu masha ni hpe kahkyin nhtawm, dabang komiti mare, lawk komiti salang ni hte matut mahkai hkri dun la nna, gat seng madu ni a phone nambat kaw dan tawk htet nna masat da ai shara kaw sa la mai ai lam, Salang Kaba matut tsun ai.

Ana zinli masa hta hkan nna tara shaja ra wa ai aten hta gaw, malu masha ra kadawn ai lam nbyin hkra Muklum kata na gat seng ni hpe aten masat nhtawm, shani shagu ngu na hpaw sa wa na rai nna, ya aten Laiza Muklum kata hta Myitkyina Muklum hte Manmaw Muklum de na gun rai malu masha ni hpe sha htaw shalai la ai re lam chye lu ai.