Laiza Muklum kata COVID-19 ana dabat jep chyoi ai lam galaw nga
Ginjaw Ginra Ginwang Ginjaw, Laiza Muklum hte Laiza makau grup yin kaw shanu nga ai mungchying mungshawa ni hte magam gun kaji kaba yawng hpe COVID-19 ana dabat jep chyoi ai lam galaw nga dingyang re hpe chye lu ai.
Ndai ana jep chyoi masing hpe lai wa sai July shata (27) ya shani kaw nna ana jep chyoi hpang ai hta, ya aten du hkra rai yang positive jep mu lu ai masha marai (52) nga sai rai nna, dai positive masha ni hpe Mung Lai Hkyet kaw tsi gawn lajang nga ai lam chye lu ai.
Ana jep chyoi masing hpe Muklum kata, lawk mare shagu hpe yawm htum (3) lang jep chyoi nhtawm, yawng hta ana nkap sai (negative) re ai shaloi she lockdown hte stay at home ni hpe gau ngwi ngwi bai hpaw sa wa na re lam, Ginjaw COVID-19 Ana Zinli Makawp Ninghkap Komiti kaw na ndau da ai lam nga ai re.
Sinpraw Ginwang Ginjaw, Mai Ja Yang Muklum kata hta gaw, COVID-19 positive jep mu lu ai masha yawng marai 762 hpe tsi tsi gawn lajang nga ai rai nna, tsi gawn lajang dabang kaw na marai 128 gaw ana mai tsai sai majaw, nta de wa shangun sai lam, August shata praw 4 ya shani hta gaw, Mai Ja Yang Muklum kata home lockdown masat tawn da ai n-ta ni hpe ana jep chyoi nhtawm, negative mahtai rai sai majaw home lockdown ni hpe bai dawm kau ya sai lam, Sinpraw Ginwang Ginjaw COVID-19 Ana Zinli Makawp Ninghkap Komiti kaw na chye lu ai.
Ya aten KIO uphkang ginra kata COVID-19 ana zinli matut nchyam bra na matu hte mungshawa kata de up makoi rawng ai lam nbyin na matu Muklum kata, mare lawk, hpyen yen dabang ni hpe lockdown, stay at home masat nhtawm, ana jep chyoi ai hpe matut galaw nga dingyang re lam chye lu ai.
