TNLA hte RCSS ni numdaw mi bai gasat gala majan byin wa

Laknak lang rawt malan shada rai nga ai TNLA hpyen hpung hte RCSS hpyen hpung ni, May 13 hte 14 lahkawng ya, Chyawk Mye ginwang shara ni hta gasat gala majan numdaw

mi bai byin wa ai lam na chye lu ai.

Gasat gala majan byin ai shara gaw, TNLA Dap Ba ( 2 ) ginra, Chyauk Mye ginwang Hkun Kaw mare makau hta May 13 ya jahpawt hkying 5:20am aten kawn hkying 6:20am aten du hkra TNLA Dap Dung ( 256 ) na hpyen hpung hte RCSS hpyen hpung ni gap hkat ai, May 14 ya hta mung, TNLA Dap Dung ( 434 ) na hpyen hpung hte RCSS hpyen hpung ni, Chyau Mye ginwang Hkun Kaw mare hte Taw Hpe mare lapran kaw hkying 9:00am aten kawn shani ka-ang hkying 12:00pm aten du hkra, gasat majan byin ai lam na chye lu ai.

Majan bai byin wa ai lam gaw, RCSS hpyen hpung ni, TNLA ni a ginra de tawt lai shang wa ai  sha n-ga, RCSS hpyen hpung ni mare kata de laknak kaba gap bun ai hta, Ta Chyaw Hkai, Ta Ai Na, Ya E La ni a nta kaw pala si wa hkrat kapaw ai majaw, Ya E La asak 60 ning hte kashu Mai Aung Ye Lin asak 6 ning yan hkala hkrum mat ai.

TNLA hpyen hpung hte RCSS hpyen hpung ni, 2016 ning December 22 ya shani hta gap hkat ai lam hpang jahtum rai nna, May 13 ya shani kawn numdaw mi bai gasat majan byin wa ai re lam TNLA shiga lawk kaw na chye lu ai.

RCSS hpyen hpung ni gaw, Mungdan ting gap hkat jahkring NCA ta masat htu ai uhpung langai mung rai nna, TNLA ni gaw NCA ta masat nhtu shi ai uhpung rai nga ai.