Mungmyit Sinli Ga (Kachin Sub-state) ginra hta gasat poi matut manoi byin ai majaw mungshawa langai hkala hkrum

Mungmyit Sinli Ga (Kachin Sub-state) ginra hta hpyen shamu shamawt hkawm nga ai Gumshem Myen hpyen dap ni hte Kokang MNDAA hpyen hpung ni, Myen Dang Bum grup yin kaw August shata 21 ya jahpawt hkying 7:00am aten kaw nna hkying 11:45am aten du hkra gasat poi bai matut byin ai lam chye lu ai.

“Dai ni hkying 10:56am aten kaw nna hkying 11:10am aten laman hta mung, Bang Sai maga kawn hpyen shamu shamawt shang wa ai Gumshem Myen hpyen hpung ni hte Kokang MNDAA ni, Nam Ba Tek hte Yi Hku mare lapran kaw gasat poi byin ai” nga nna shawng lam na salang langai tsun ai.

August shata 20 ya shani hta mung, Bang Sai Gumshem Myen Balik Dap hpe Kokang MNDAA ni sa htim gap ai majaw, lahkawng maga gasat poi byin nna sinat lanak si kaba Bang Sai nawku jawng hte hpaji jawng kaw wa hkrat hkra ai majaw, quarantine shang nga ai mungshawa langai hkala hkrum ai lam, dai ginra na salang langai tsun ai.

Mungmyit Sinli Ga (Kachin Sub-state) ginra hta, Gumshem Myen hpyen dap kawn hpyen shamu shamawt ai lam dingyang galaw nga ai majaw, KIA ni hte gasat poi byin ai sha n-ga, Kokang MNDAA ni hte mung lai wa sai July shata praw 4 ya shani kaw nna ya aten du hkra gasat poi ni matut manoi naw byin nga ai re.