KIA Masat (5) Dap Dung hte Mungmyit Sinli Ga (Kachin Sub-state) ginra ni hta gasat poi byin

KIA Masat (8) Dap Ba, Masat (5) Dap Dung ginra, Ga Hkyeng Bum Ginwang, Chyauk Ji (ေက်ာက္ႀကီး) makau kaw September shata praw 3 ya jahpawt hkying 7:30am aten kaw nna hkying 9:30am aten laman, Gumshem Myen hpyen dap hte KIA hpyen hpung ni gasat poi byin ai lam chye lu ai.

“Chyauk Ji kaw du nga ai Gumshem Myen hpyen dap Hk.M.Y (363) dap na hpyen n-gun (80) jan hpung ni gaw, KIA ni nga ai shara de htu shadut lung wa majaw, hkap shingla gasat poi byin ai” nga nna shawng lam na lit nga ai salang langai shana wa ai.

Mungmyit Sinli Ga (Kachin Sub-state), Hpawng Seng, Loi Ngu Bum mayan hta mung, shana maga hkying 3:20pm aten daram hta Gumshem Myen hpyen dap ni shamu shamawt htim gasat lung wa ai majaw, Kokang MNDAA ni hte gasat poi byin ai rai nna, gasat poi byin ai shara de Gumshem Myen hpyen dap kawn laknak kaba dingyang gap bun nga ai lam, dai ginra na salang langai tsun ai.

Jahpawt hkying 9:00am aten hta gaw, Hpawng Seng Gumshem Myen hpyen dap hte Kokang hkran na Gumshem Myen hpyen dap ni kawn Kokang MNDAA ni nga ai Loi Ngu Bum grup yin de sinat laknak kaba (40) lang daram gap bun nga ai lam, salang wa matut tsun ai.

September shata praw 2 ya shana hta mung, hkying 9:5pm aten daram hta Daw Hpum Yang Hk.L.Y (142) Dap kawn gap dat ai sinat laknak kaba si Daw Hpum Yang mare lawk (3) na salang Manam Kang Htu Naw Tawng a Nga lawng kaw wa hkrat bun ai majaw, Uloi (3) si sum mat ai lam matut chye lu ai.