Chyoi pra ai Udang shagrau Misa hkungga nawng jau akyu hpyi lamang galaw
Chyoi pra ai Udang shagrau Misa hkungga nawng jau akyu hpyi lamang hpe September shata 14 ya shani Wa Jau, Ma Ma ni hte hpung magam gun nkau shang lawm ai hte Laiza Muklum, Woi Chyoi Bum ntsa na Udang Bum kaw galaw ai lam chye lu ai.
Chyoi pra ai Udang shagrau poi hpe masa lam amyu myu a majaw, lai wa sai shaning na zawn hpung shawa law law hte wu wu di di nlu galaw ai raitim, daining gaw Udang shagrau Misa hkungga nawng jau akyu hpyi lamang hpe byin mai ai hku galaw ai re lam chye lu ai.
Myitkyina Alam Bum ntsa hta mung, hkying 10:00am aten hta (38) lang na Alam Akyu Hpyi Bum, Udang shagrau Misa hkungga akyu hpyi lamang hpe galaw ai lam na chye lu ai.
Lai wa sai 2019 ning September shata 14 ya shani, Laiza Jau Ginwang, Woi Chyai Bum hta galaw ai Udang shagrau poi lamang hta gaw, hpung shawa masha marai 3600 jan wa du shang lawm ai hte wu wu di di galaw lai wa sai re.
Chyoi pra Udang shagrau poi lamang hpe buga ginra shara shagu hta September shata 14 ya shani du shagu galaw ai rai nna, Laiza Jau Ginwang, Woi Chyai Bum Udang shagrau poi hpe lai wa sai 2002 ning September shata 14 ya shani kaw nna galaw hpang ai re lam chye lu ai.
