KIA Masat (45) Dap Dung ginra hte Mungmyit Sinli Ga ginra ni hta gasat poi matut byin
KIA Masat (2) Dap Ba, Masat (45) Dap Dung ginra, Sumbwi Yang Ginwang, Tahkyet hte Tarung lapran kaw September shata 15 ya jahpawt, hkying 6:00am aten daram hta KIA hte Gumshem Myen hpyen dap ni gasat poi byin ai lam chye lu ai.
Gumshem Myen hpyen hpung ni gaw, Tarung mare kaw nna hpyen shamu shamawt lung wa ai kaw KIA hpyen hpung ni bawm hte hkap shingla gasat ai re lam, dai ginra na salang langai tsun ai.
Mungmyit Sinli Ga (Kachin Sub-state) ginra hta mung, September shata 15 ya shana maga hkying 3:20pm aten hta Nam Su hte Naw Gu lapran kaw Tatma (99) kata na Gumshem Myen hpyen hpung ni hte Kokang MNDAA pawng hpawm hpyen hpung ni, gasat poi byin ai re lam chye lu ai.
“Tatma (99) kata na hpyen n-gun (60) daram hpung ni gaw, hpyen shamu shamawt htu shadut hkawm ai kaw, MNDAA pawng hpawm hpyen hpung ni hkap gap gasat ai hta, minutes (10) daram gasat poi byin ai” nga nna shawng lam na lit nga ai salang langai tsun ai.
Ya aten Jinghpaw Mung hte Mungmyit Sinli Ga (Kachin Sub-state) ginra ni hta, Gumshem Myen hpyen dap ni kawn hpyen shamu shamawt htu shadut ai lam dingyang naw galaw nga ai majaw, KIA, Kokang MNDAA hpyen hpung ni hte Gumshem Myen hpyen dap ni gasat poi dingyang naw byin nga ai re.
