Mungmyit Sinli Ga (Kachin Sub-state) ginra hta MNDAA ni hte Gumshem Myen hpyen dap ni gasat poi matut byin
Mungmyit Sinli Ga (Kachin Sub-state) ginra hta hpyen shamu shamawt hkawm nga ai Tatma (99) kata na Gumshem Myen hpyen dap ni hte Kokang MNDAA hpyen hpung ni September shata 18 ya shani hta, shara (3) kaw gasat poi byin ai lam chye lu ai.
“Bang Sai, Nam Hu mare makau kaw jahpawt hkying 8:30am aten daram kaw nna hkying 9:00am aten du hkra Kokang MNDAA ni hte Gumshem Myen hpyen dap ni gasat poi byin ai. Nam Su hte Naw Gu lapran kaw hkying 10:30am aten hta minutes (10) daram gasat poi byin ai. Loi Jung Bum mare makau kaw hkying 10:53am aten gasat poi byin ai rai nna, Gumshem Myen hpyen dap kawn grup yin de sinat lanak hkrup mara gap bun ai lam nga ai” nga nna dai ginra na lit nga ai salang langai shana wa ai.
Tatma (99) kata na pawng hpawm Gumshem Myen hpyen hpung n-gun (300) daram hpung ni gaw, Kokang MNDAA ni nga ai shara de hpyen shamu shamawt htu shadut hkawm ai kaw MNDAA hpyen hpung ni hkap shingla gasat ai masa re lam, salang wa matut tsun ai.
Gumshem Myen hpyen dap kawn Jinghpaw Mung hte Mungmyit Sinli Ga (Kachin Sub-state) ginra ni hta, hpyen shamu shamawt htu shadut ai lam dingyang galaw nga ai majaw, KIA, MNDAA hpyen hpung ni hte Gumshem Myen hpyen dap ni gasat poi matut manoi byin nga ai re.
