Htunghking Labau Munu Sara Kaba Pungga Ja Li madu yesu hta yup pyaw mat wa
Htunghking Labau Munu Sara Kaba Pungga Ja Li asak 74 ning gaw, May, 25 ya jahpawt hkying 1:00am aten hta, Myitkyina Muklum Njang Dung Buga Nta no. ( 144 ) kaw shanu
nga ai kanau Hpungtau Pungga Zau Tawng a dum nta kaw Madu Yesu hta yup pyaw mat wa sai lam na chye lu ai.
Makoi mayang akyu hpyi hpawng lamang hpe May 27 bat hpang 6 ya jahpawt hkying 9:00am aten hta Njang Dung Nawku jawng wang hta galaw nna, Nawng Nang Hkristan lupding lupra de, makoi mayang ai lam galaw na re hpe chye lu ai.
Sara kaba Pungga Ja Li gaw, 1944 ning March praw 2 ya hta Tinggaw Ga, Pungga mare kaw shangai ai. 1955 ning hta jawnglung hpang ai. 1966 ning kaw nna, 1969 ning du hkra, Nawng Nang Chyumjawng kaw lung ngut nhtawm, 1969 ning kaw na 1991 ning du hkra, Njang Dung buga kaw Hpung Up magam bungli hpe gunhpai lai wa sai Sara kaba mung re.
1989 ning kaw nna, daini 2017 ning du hkra, Wunpawng Mungdan Shanglawt Asuya Htunghking hte Laili Laika Magam Dap hta nga let, Amyu sha ni a Shanhpyi Laika sawk gyin Makan Dap a hpa-awn hku gunhpai nga ai Sara kaba re hpe mung chye lu ai.
