Gumshem Myen hpyen arung arai htaw Modo hpung ni hpe hkap gap
Mungmyit Sinli Ga (Kachin Sub-state) ginra, Bang Sai kaw nna Myen hpyen la hte hpyen arung arai htaw lung wa ai Gumshem Myen hpyen Modo (37) daram hpung ni hpe Mung Lung makau kaw September shata 23 ya shani hkying 11:00am aten hta Kokang MNDAA hpyen hpung ni hkap shingla gap gasat ai lam chye lu ai.
“Jahpawt hkying 4:30am aten kaw nna Bang Sai kawn Myen hpyen la hte hpyen arung arai ni htaw ai Gumshem Myen hpyen Modo (37) daram lai lung wa ai, hkying 11:00am hta Mung Lung makau kaw Kokang MNDAA ni hkap gap ai. Gumshem Myen hpyen ni kaw nna mung, lam makau de dingyang sinat gap nna lai taw ai” nga nna dai ginra na lit nga ai salang langai shana wa ai.
Ya aten Mungmyit Sinli Ga (Kachin Sub-state) ginra hta, Gumshem Myen hpyen dap kawn shani shana hpyen shamu shamawt htu shadut ai lam dingyang galaw nga ai majaw, KIA, Kokang MNDAA hpyen hpung ni hte gasat gala majan jahkring hkring byin nga ai re.
Jinghpaw Mung ginra de mung, Gumshem Myen hpyen dap kawn Myen hpyen la hte hpyen arung arai htaw shalai ai lam, hpyen shamu shamawt htu shadut ai lam galaw nga ai re hpe na chye lu ai.
