Gumshem Myen hpyen dap ni gap dat ai Amyawk si hkra nna mungshawa marai (2) hkala hkrum
Mungmyit Sinli Ga (Kachin Sub-state) ginra hta September shata 27 ya shana hkying 10:00pm aten, Gumshem Myen hpyen dap ni gap dat ai Amyawk si Salang Tang Gun a nta kaw wa hkra ai majaw, madu Jan Labang Roi hte kasha Ma Bung hkra hkala hkrum ai lam na chye lu ai.
Gumshem Myen hpyen dap ni gaw, Sakhkung Hka Sinpraw Kokang Laugai hkran kawn Amyawk si gap shadam bang dat ai hta, Pawang Wurawng Manhka mare kaw na Salang Tang Gun a n-ta kaw wa hkra ai majaw, madu jan Labang Roi hte asak (9) ning re ai La kasha Ma Bung hkra hkala hkrum ai re lam, dai ginra na lit nga ai salang langai tsun ai.
Kasha Ma Bung mahtang gaw baw, hkum hte lagaw hkan pala hkyep hkra ai majaw, ningma grai sawng ai re lam matut chye lu ai.
September shata 27 ya shana maga hkying 4:16pm aten hta mung, Bang Sai kawn shamu shamawt pru wa ai Gumshem Myen hpyen n-gun (100) daram hte machyu pala, lu sha htaw lung wa ai Modo (11) hpung ni hpe Kokang MNDAA ni hkap shingla gasat ai hta, Gumshem Myen hpyen dap ni kawn sinat laknak kaji kaba gap shadam bun ai lam chye lu ai.
