Tarahkaw sara, saranum shagrau lamang galaw
Laiza Jau Ginwang, Ginwang Up Jau hte mungbawng salang ni kaw na woi awn nhtawm, Kahtawlik nawku hpung a tarahkaw sara, saranum ni hpe shagrau sha-a ai ninghtoi (San Luka poi) lamang hpe October shata (18) ya shani hkying 2:00pm aten hta, Laiza Muklum, Nazazet Zunlawng kaw galaw ai lam chye lu ai.
Lamang hta, Laiza Kahtawlik nawku hpung tarahkaw sara, saranum ni hpe nawku hpung, num hpung, la hpung, ramma hpung hte Ma sasana hpung ni kaw nna masat masa kumhpa shagrau sha-a ai lam galaw ai re.
Ginwang Up Jau, Wa Jau Peter Lazum Tu Lum kaw nna tarahkaw sara shagrau mungga hpe tsun ai rai nna, Mungbawng Hpung Ningbaw, William N’ru Naw Ut kaw nna chyeju dum n-gun jaw mungga shaga ai hta, Kahtawlik nawku hpung rawt jat wa na hte tinang a nawku hpung masha ni makam masham ngang kang wa lu na matu, hpung masha ni ra rawng gawng kya ai lam ma hkra ntsa, ahkying aten n lata ai sha galoi raitim woi awn lanu lahku la marit nga nna, shatsam mungga hta tsun ai.
Tarahkaw sara, saranum shagrau sha-a lamang hpe lai wa sai shaning ni hta gaw, nawku jawng kata hpung shawa law law hte galaw ai raitim, dai ning gaw, lamang hpe COVID-19 ana zinli makawp ninghkap tara hte maren mai byin ai hku galaw ai lam chye lu ai.
Lamang hta Laiza ginra Kahtawlik nawku hpung magam gun ni, Wa Jau, Ma Ma ni, Mungbawng salang ni hte ramma ni sa du shang lam ai lam chye lu ai.
