KIA hte Gumshem Myen hpyen dap ni gasat gala majan matut byin
Mungmyit Sinli Ga (Kachin Sub-state) KIA Masat (6) Dap Ba, Masat (9) Dap Dung ginra, Kutkai Ginwang, Hkalum Pa makau, Seng Hawm Bum kaw October shata (18) ya jahpawt hkying 9:35am aten hta, KIA Dap Dung (9) hpyen hpung ni hte Gumshem Myen hpyen dap ni gasat gala majan byin ai lam chye lu ai.
Gumshem Myen hpyen dap, Hk.L.Y (69), (290) dap ngu maram lu ai hpyen n-gun 200 daram re hpyen hpung ni Man Kang Bum kawn Dak Nai maga de nhtang yu wa ai kaw KIA hpyen hpung ni hkap gap gasat dat ai lam, shawng lam na lit nga ai salang ni shana wa ai.
October shata (16) ya shani hta mung, KIA Masat (6) Dap Ba ginra, Dima, Man Kang Bum grup yin de Tatma (99) kata na Gumshem Myen hpyen n-gun (150) jan htu shadut lung wa ai majaw, KIA hte Gumshem Myen hpyen hpung ni gasat gala majan byin ai lam nga ai re.
KIA Masat (8) Dap Ba, Masat (5) Dap Dung ginra, Ga Hkyeng Bum Ginwang, Man Loi mare grup yin hta mung, October shata (17) ya shana de hkying 5:00pm aten hta, Myitkyina kaw na yu wa ai Gumshem Myen hpyen dap, Jet Nbung Li (2) hte bawm wa jahkrat bun ai re lam na chye lu ai.
