KIA Masat (45) Dap Dung hte Masat (15) Dap Dung ginra kaw gasat gala majan matut byin
KIA Masat (2) Dap Ba, Masat (45) Dap Dung ginra, Laja Bum hte Tarung mare lapran kaw October shata 22 ya jahpawt hkying 8:50am aten hta, dai mayan hpyen shamu shamawt hkawm nga ai Gumshem Myen hpyen hpung ni hte KIA ni gasat gala majan byin ai lam chye lu ai.
Gumshem Myen hpyen hpung ni gaw, Laja Bum maga de hpyen shamu shamawt hkawm ai kaw, KIA hpyen hpung ni hkap gap gasat ai kawn gasat poi byin ai rai nna, gasat gala majan byin ai makau grup yin de Gumshem Myen hpyen dap ni Nbungli hte wa pyen gawoi hkawm ai lam chye lu ai.
KIA Masat (3) Dap Ba, Masat (15) Dap Dung ginra, Hka Wan Bang hte Nmawk lapran hta mung, jahpawt hkying 6:30am aten dai mayan shamu shamawt hkawm nga ai Gumshem Myen hpyen n-gun (60) daram hpung ni hpe KIA ni bawm hte hkap gap gasat ai hta, Gumshem Myen hpyen dap kawn grup yin de sinat laknak hkrup mara gap bun ai lam, shawng lam na lit nga ai salang ni tsun ai kaw na chye lu ai.
Ya aten Jinghpaw Mung hte Mungmyit Sinli Ga ginra ni hta Gumshem Myen hpyen dap ni kawn hpyen shamu shamawt ai lam dingyang galaw nga ai majaw, KIA hte Gumshem Myen hpyen dap ni gasat gala majan jahkring hkring byin nga ai re.
