Manmaw Ginwang Chyum jawng yu lamang galaw
(7) lang na Manmaw Ginwang Chyum Jawng yu hpawng lamang hpe October shata (30) ya shani hkying 10:00am aten hta, Manmaw Ginwang Chyum Jawng wang gawknu kaw galaw ai lam chye lu ai.
Dai ni jawng yu ai gaw, Diploma of Theology program kaw na jawngma marai (7) rai nna, jawng awng lakmat hpe Jawng Up, Sara Kaba Marip Gam Seng kaw nna shagrau jaw ai lam chye lu ai.
2021 ning hta gaw masa lam amyu myu a majaw, Diploma of Theology program hpe sha hpaw sharin shangut shakre la ai rai nna, kaga program ni hpe gaw gan pat da ai lam, Jawng Up tsun ai kaw na chye lu ai.
Lamang hta Manmaw Ginwang hpung magam gun ni, nawku hpung magam gun ni, jawng sara, jawngma ni shang lawm ai hte galaw ai lam chye lu ai.
November shata praw (5) ya shani kaw nna gaw, Manmaw Ginwang Chyum Jawng hta, Computer (basic), English (Elementary & Pre-Intermediate), Guitar (Rhythm), Violin, Music Theory & Sight Reading hte Bible study lamang ni hpe bai hpaw sharin sa wa na re majaw, myit lawm ai kadai raitim sa du sharin hkaja la mai lam, matut chye lu ai.
2022-2023 ning hpaji sharin ladaw a matu, May shata 25 ya shani kaw nna Licentiate of Theology (L.Th), Diploma of Theology (Dip. Th) hte shata (6) chyum laika hkaja lamang ni hta mung, jawngma bai hkap la sa wa na re lam chye lu ai.
