N-gum La Muklum kata COVID-19 ana positive pru shadang yawm wa
Dingdung Ginwang Ginjaw, N-gum La Muklum kata COVID-19 ana zinli positive pru shadang yawm wa sai rai nna, November shata praw (5) ya shani du hkra rai yang, ana kap ai positive masha marai (202) tsi tsi gawn lajang hkamla nga ai lam chye lu ai.
Lai wa sai October shata (23) ya shani kaw nna N-gum La Muklum, N-gum La lahta tsang jawng kaw COVID-19 ana zinli jep chyoi hpang ai hta, positive byin ai masha marai (546) du mat ai raitim, ana dabat jep chyoi ai lam hpe bat mi hta kalang bai galaw ai hta, positive pru shadang yawm wa sai rai nna, ana kumla (2) lang negative pru nna ana tsep kawp mai tsai sai masha marai (80) hpe gaw, tinang dum nta de wa ahkang jaw sai lam, Dingdung Ginwang Ginjaw COVID-19 Ana Zinli Makawp Ninghkap Komiti kaw na chye lu ai.
Ya aten Quarantine hkamla nga ai mung masha ni gaw marai (421) nga ai rai nna, malu masha hte ana tsi gawn lajang hpung hpaw nhtawm, ana kap bra ai masha ni yawng hpe dangdi dangdep ai tsi mawan ni hte tsi gawn lajang nga ai lam, ginra masa hta hkan nna byin ai, waw shang baw machyi, kaji kajaw re ana kumla ni hte seng ai tsi mawan ni mung, naw ra kadawn nga ai lam matut chye lu ai.
Ana jep mu ai positive masha ni kaw na, dum nta kata mayak nga ai ni hpe laksan tsi gawn lajang shara kaw tsi gawn lajang ya nga ai rai nna, nkau positive masha ni hpe gaw tinang dum nta kaw nan lockdown masat nhtawm tsi gawn lajang ya nga ai lam chye lu ai.
N-gum La Muklum hpe lai wa sai October shata (23) ya shani kaw nna ana zinli kap bra shadang tsaw jat wa ai majaw, masha pru shang hkawm sa ai lam hpe aten n masat lockdown masat nhtawm, ana tsi gawn lajang jep chyoi ya nga dingyang re lam chye lu ai.
