Nam Jan Hku, gumshem Myen hpyen ni dung ai post hpe KIA ni sa htim gap
KIA Masat (9) Dap Ba, Masat (6) Dap Dung ginra, Nam Jan Hku, gumshem Myen hpyen post hpe November shata 13 ya shana maga hkying 4:30pm aten hta KIA hpyen hpung ni sa htim gap ai lam chye lu ai.
“Nam Jan Hku, Myen Hpyen Dap, Dapnu (33) kata na Hk.M.Y (111) dap na hpyen n gun (70) daram dung da ai post rai nga ai” nga nna shawng lam na lit nga ai salang langai tsun dan ai.
Ya na masa hpe yu yang gasat gala majan gaw matut nna naw mai byin wa ai lam, salang wa matut tsun ai.
November shata 11 ya shana maga hkying 5:00pm aten daram hta mung, KIA Masat (3) Dap Ba ginra, Mali hka hku nna, gumshem Myen hpyen dap ni a sanghpaw li lahkawng hpe, ginra mungshawa makawp maga hpyen hpung (PDF) ni kaw nna, Shwegu, Sit Kung Chun kaw hkap gap kau ya ai lam nga ai.
Dai sanghpaw li hta hpyen n gun, malu masha hte hpyen lang rung lang rai htaw lung wa ai rai nna, sanghpaw li langai hten hkrum mat ai lam na chye lu ai.
