KIA Masat (26) Dap Nawng Dap Dung ginra kaw KIA hte gumshem Myen hpyen ni gasat gala majan byin
KIA Masat (9) Dap Ba, Masat (26) Dap Nawng Dap Dung ginra rai nga ai, Nawnglut Ginwang, Nyaung Htauk mayan kaw December shata praw 1 ya jahpawt hkying 6:00am aten hta KIA hte gumshem Myen hpyen ni gasat gala majan byin ai lam chye lu ai.
Gumshem Myen hpyen dap Hk.L.Y (42) dap na hpyen n gun 50 daram nga ai hpyen hpung ni gaw, KIA hpyen hpung ni nga ai shara de hpyen man lahkawng hku nna, shamu shamawt shang wa ai majaw, shani ka-ang hkying 12 chyen daram du hkra gasat poi byin ai re lam, shawng lam na lit nga ai salang ni kaw na chye lu ai.
Laiwa sai November shata 25 ya shani hta mung, KIA Masat (26) Dap Nawng Dap Dung hpyen dap kaw gumshem Myen hpyen ni Jet Fighter nbungli 2 hte bawm wa jahkrat gasat ai lam mung nga ai hpe chye lu ai.
Gumshem Myen hpyen ni gaw, Jinghpaw Mung hte Mungmyit Sinli Ga (Kachin Sub-state) ginra ni de hpyen shamu shamawt lam hpe mawdaw hte htaw sa ai hku nna mung, hka sanghpaw li ni hte mung KIA ni nga ai shara de matut manoi hpyen n gun jat nga ding yang re lam, ginra shi sawk ni kaw na chye lu ai.
Ya na zawn hpyen shamu shamawt shang wa ai gumshem Myen hpyen ni hpe KIA hpyen hpung ni hte ginra mungshawa makawp hpyen hpung PDF ni kaw nna hkap shingla gasat ai lam galaw nga ai hpe mung na chye lu ai.
