KIA ni nga ai ginra de hpyen n gun htu lung wa ai gumshem Myen hpyen modo hpung ni hpe KIA ni hkap gap gasat
Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung hte Masat (39) Dap Nawng Dap Dung ginra de, shamu shamawt shang wa ai gumshem Myen hpyen modo (25) hpung ni hpe December shata praw 8 ya jahpawt hkying 2 hte hkying 3 aten laman hta Bum Sum Shi (Loi Sam Sip) lagaw Namba Chyi mare modo lam kaba kaw KIA ni hkap gap gasat ai lam na chye lu ai.
Lashio maga na lung wa ai Myen hpyen modo (25) re. Anhte kaw na ni Namba Chyi mare modo lam kaba kaw hkap gap gasat ma ai, modo langai gaw dai shara kaw hten mat ai, si hkala masha gaw kade re atsawm n chye lu ai, ngam ai modo ni gaw leng baw ai gaw baw rai Kutkai de lai shang mat masai. Kutkai kaw na bai lung wa ai modo hpung ni hpe, Nam Hpalun Bum lai Hpa Hkyik mare makau kaw Masat (39) Dap Nawng Dap Dung ni bai hkap gap ai lam nga ai, nga nna shawng lam na lit nga ai salang langai tsun dan ai.
Myen dap gaw kara dap ni re nlu sagawn shi ai, Lashio de na lung wa ai re nga jang, ya na ni gaw dap langai sha nre gayau kaya rai nna she htu htu rai ma ai lam, salang wa matut tsun ai.
December shata praw 7 ya shani hta mung, Masat (39) Dap Nawng Dap Dung ginra de shamu shamawt shang wa ai gumshem Myen hpyen hpung ni hpe, Masat (39) Dap Nawng Dap Dung ni Shuhkinta bum kaw bawm hte hkap gasat ai lam na chye lu ai.
