KIA Masat (15) Dap Dung ginra kaw, gumshem Myen hpyen ni hte KIA ni gasat gala majan byin
KIA Masat (3) Dap Ba, Masat (15) Dap Nawng Dap Dung ginra hta shamu shamawt hkawm ai gumshem Myen hpyen hpung ni hte KIA ni December shata 14 ya shana maga hkying 2:00pm aten daram hta Hpaga hka makau kaw gasat gala majan byin ai lam chye lu ai.
“Myen hpyen ni gaw, Ts.K.Hk (21) kata na hpyen hpung ni re. Bum Sen maga de lung wa ai, Hpaga hka makau kaw anhte kaw na ni hte ang katut gasat poi byin ai” nga nna shawng lam na lit nga ai salang langai tsun dan ai kaw na chye lu ai.
December shata 13 ya shani hta mung, Mungmyit Sinli Ga (Kachin Sub-state) KIA Masat (6) Dap Ba, Masat (36) ginra, Sin Sai Htang grup yin shara ni hta Kokang MNDAA ni hte gumshem Myen hpyen ni laja lana gasat poi byin ai lam ni nga ai.
Gasat poi byin ai shara de gumshem Myen hpyen ni kaw nna hpyen gasat nbungli hte bawm wa jahkrat gap ai sha n ga, laknak kaba ni hte hkrup mara gap shadam bun ai majaw, Bangmwi mare na mungshawa nta 3 hten hkrum mat ai lam na chye lu ai.
