Sammung Wunpawng Laili Laika hte Htunghking Hpung Ramma bawngban zuphpawng galaw la lu
(4) lang na Sammung Wunpawng Laili Laika hte Htunghking Hpung Ramma Dap E.C bawngban zuphpawng hpe Muse Ginwang, Nam-um Buga, Nawng-ing Kahtawng kaw December shata 14 hte 15 lahkawng ya laman galaw la lu sai lam chye lu ai.
Ramma ni yawng amyu htunghking laili laika shachyen shaga lam labau lasang ni hpe hkrak chye wa lu na matu, ramma ni lam magup hta ningbaw ningla kaja tai wa lu na matu, ramma ni hkrung grin ai bungli grak lagra re ai bungli shachyen shaja nga lu na matu, bu htawt magam bungli galaw ai ni shim lum ai hte galaw lu na matu hte Sammung Wunpawng Laili Laika hte Htunghking Hpung Ramma Dap hpaw ninghtan ai hkrang grak lagra rai wa lu na matu yaw shada let bawngban hpawng galaw ai re lam, Saranum Lahkum Lahpai Seng Ja Awng (Amu Madu) tsun ai.
Bawngban hpawng hta, lam magup yak hkak ginchyum chyat ai lapran hta raitim, 2022 shaning hta galaw sa wa na shawng lam bungli masing ni, ramma ni n-gun gawgap gahkyin gumdin na lam yan ni, 2023 ning hta magam gun ladaw galai lamang hte 2 lang na ramma shawa zuphpawng kapyawn galaw lu na lam ni hpe bawngban la lu sai lam, saranum matut tsun ai.
Zuphpawng hta, Ginwang (19) kaw na Ramma Ningbaw, Amu Madu ni, laksan saw shaga da ai hpaji jaw salang ni hte Sammung Wunpawng Laili Laika hte Htunghking Hpung Ginjaw Ningbaw, Amu Madu ni shang lawm galaw la lu sai lam chye lu ai.
Sammung Wunpawng Laili Laika hte Htunghking Hpung Ramma Dap hpe lai wa sai 2011 ning kaw nna hpaw ninghtan da sai hte E.C zuphpawng hpe ra ahkyak ai hta hkan nna laning mi hta 2 lang galaw ai re lam chye lu ai.
