KDA Ningbaw Kaba Mahtu Naw si wai mat

Mungmyit Sinli Ga (Kachin Sub-state), Wunpawng Mungshawa Makawp Maga Hpyen Dap, (Kachin Defense Army-KDA) Ningbaw Kaba Mahtu Naw Asak (78) ning gaw, December shata 23 ya shani machyi makaw a majaw, Kawnghka shi a dum nta kaw Madu Yesu hta yup pyaw mat wa sai lam na chye lu ai.

Makoi mayang akyu hpyi hpawng hpe December shata 27 ya shani, AD.2000 Masat Nawku Htingnu (Kawnghka Sasana Wang) hta galaw na rai nna, hkalum shara hpe gaw, KDA Hpyen Dap Gawknu kaw galaw na re lam chye lu ai.

Du Kaba Mahtu Naw gaw, Hpyen Du, Hpyenla nkau hte KIA Masat (4) Dap Ba kaw nna, ga karan pru nhtawm, 1991 ning hta Gumshem Myen Hpyen Dap hte simsa lam lakmat htu nna, Wunpawng Mungshawa Makawp Maga Hpyen Dap, KDA mying hte Kutkai Ginwang Kawnghka mare kaw ginjaw jung ai wuhpung re.

2010 ning hta gaw KDA mying kaw nna Gumshem Myen Hpyen Dap a npu, Kawnghka Pi Tu Tsit mying bai galai mat ai re hpe chye lu ai.