Man Pying mare ntsa kaw KIA hte Gumshem Myen hpyen ni gasat gala majan byin
Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung ginra hta December shata 25 ya shani KIA ni hte gumshem Myen hpyen ni gasat gala majan byin ai lam chye lu ai.
Gasat poi byin ai shara gaw, Bum Sum Shi (Loi Sam Sip) lawu Man Pying mare ntsa kaw mana de hkying 4:00pm aten kawn hkying 5:15 aten du hkra, Masat (8) Dap Dung, Masat (29) Dap Nawng Dap Dung ni hte Dap mying n chye ai Myen hpyen n gun (40) hpung ni gasat poi byin ai. Anhte maga hpa nra ai, tai hpyen maga na si hkala naw sagawn nga ai lam, shawng lam na lit nga ai salang ni kaw na chye lu ai.
KIA Masat (6) Dap Ba, Masat (36) Dap Dung ginra, Naw Gu Mare makau hta mung, December shata 24 ya shani hkying 11:20am aten hta gumshem Myen Hpyen Dap, Dapnu (77) kata na hpyen n gun (60) daram hte Kokang MNDAA Dap Ba (511), Dap Dung (504) hpyen hpung ni gasat poi byin ai lam na chye lu ai.
