KIA Dap Ba (8), Dap Ba (4), Dap Ba (6) ginra ni hta KIA hte gumshem Myen hpyen dap ni gasat gala majan matut byin
KIA Masat (8) Dap Ba, Masat (5) Dap Dung ginra hta, December shata (26) ya shani hkying 9:00am aten, Moe Sit kawn hpyen shamu shamawt lung wa ai gumshem Myen hpyen dap, Hk.M.Y (369) Dap na hpyen n-gun (80) daram hpung ni hte KIA Dap Dung (12) pawnghpawm hpyen hpung ni Hing Ung mare makau kaw gasat gala majan byin ai lam chye lu ai.
Gasat gala majan byin nga ai ten, Hing Ung mare na U Zaw Oo gaw mare shingnawm kaw na Kawa shaw nhtawm, Cycle hte garawt pru wa ai kaw gumshem Myen hpyen ni hkap nga ai de nmyit mada ai Cycle gau shang hkrup ai majaw, gumshem Myen hpyen ni hkap gap ai hta, pala hkra nna asak si sum mat ai lam, shawng lam lit nga ai salang kaw na chye lu ai.
Jahpawt hkying 4:40am aten hta, KIA Masat (4) Dap Ba, Masat (8) Dap Dung ginra, Muse, Namhpakka kawn shamu shamawt yu wa ai gumshem Myen hpyen la htaw Modo (29) hpung ni hpe KIA Dap Dung (39) hpyen hpung ni, Nawng Swi lahta kaw kalang, Hu Nawng makau kaw kalang bawm hte hkap gap gasat ai lam chye lu ai.
Shana maga hkying 5:20pm aten hta mung, Muse kawn shamu shamawt yu wa ai gumshem Myen hpyen la htaw Modo (10) hpung ni hpe KIA Dap Dung (8) hpyen hpung ni Hpa Hkrip mayan kaw hkap gap gasat ai lam nga ai.
Shana maga hkying 2:30pm aten hta sha, KIA Masat (6) Dap Ba, Masat (36) Dap Dung ginra, Maw Tawng Hpungkyi jawng kawn lagaw lam hte shamu shamawt pru wa ai Tatma (99) kata na Myen hpyen hpung ni hpe Maw Tawng makau kaw KIA hpyen hpung ni hkap shingla gasat dat ai lam chye lu ai.
Ya aten gumshem Myen hpyen dap ni gaw, Jinghpaw Mung hte Mungmyit Sinli Ga, (Kachin Sub-state) ginra shara shagu de hpyen n-gun jat bang ai lam, hpyen shamu shamawt ai lam nhkring nsa galaw nga ai majaw, KIA hpyen hpung ni hte shani shagu ngu na gasat gala majan byin nga ai re.
