KIA Masat (36) ginra hta gumshem Myen hpyen ni hte KIA ni gasat gala majan matut byin
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Hpun Pyen Yang hte Namhkawng Bum lapran kaw, January shata praw 5 ya shani hkying 10:10am aten kaw nna hkying 11:00am aten du hkra, KIA hte gumshem Myen hpyen ni gasat poi byin ai lam chye lu ai.
“Myen hpyen maga de, si hkala gaw nga sai, anhte maga de hpa nra ai. Myen hpyen gaw nnan bai jat wa ai lam gaw nnga ai, ya hte shani na Dapnu (Tatma-99) hte Dapnu (Tatma-101) Dap na ni sha re” nga nna shawng lam na lit nga ai salang langai tsun dan ai.
Mai Hpang mare kaw Dap jung nga ai gumshem Myen hpyen dap hte Muse 105 mile kaw nna mung, gasat poi byin ai shara hte KIA ni nga ai maga de sinat kaba gap bun ai lam chye lu ai.
KIA Masat (36) Dap Dung ginra sha rai nga ai, Hpaw Maw hte Bang Tawng Bum grup yin hta mung, dai ni January shata praw 5 ya shani gumshem Myen hpyen ni hte Kokang MNDAA hpyen hpung ni gasat poi byin ai hta shana daw hkying 3:30pm aten kaw na hkying 4:00pm aten laman, gumshem Myen hpyen ni helicopter 2 hte Bang Tawng Bum mayan kaw wa htim gap ai re lam, salang wa matut tsun ai.
Dai hpawt hkying 10:30am aten daram hta mung, Nam Hkam mare makau kaw gumshem Myen hpyen ni hte TNLA ni gasat poi byin ai majaw, Nam Hkam mare Bang Lung, Man Dung Wunzup daw hta Myen hpyen ni gap dat ai sinat kaba si mare kaw wa hkrat kapaw ai hta mungmasha marai 7 hka la hkrum ai lam, buga masha ni kaw na chye lu ai.
Hkala hkrum ai ni gaw Jan. Shadau Roi Ja, Shadau Htu Lum, Salang Zinghtung Tu Ring, Shayi Hpauyam Roi, Shayi Nhkum Lu hte Shadang Zinghtung Sut Ring Awng ni rai nna, asak 2 ning re ai Ma langai hte asak 5 ning re ai Ma lahkawng mung lawm ai lam chye lu ai.
Hkala hkrum ai ni hta Jan. Shadau Roi Ja gaw, Baw, Lahpa, Dangbau hte shingma kaw hkra mat ai lam nga ai. Hkala hkrum ai ni hpe ya aten Nam Hkam mare mungshawa tsi rung kaw tsi tsi hkam la nga ai lam chye lu ai.
