Nam Mak Zup kaw gumshem Myen hpyen ni hte KIA ni gasat gala majan byin
KIA Masat (3) Dap Ba, Masat (27) Dap Dung ginra, Nam Mak Zup kaw January shata 18 ya jahpawt 7:20am aten kaw nna hkying 8:00am aten du hkra gumshem Myen hpyen dap, Hk.L.Y (223) dap na hpyen ni hte KIA ni gasat majan byin ai lam chye lu ai.
Gumshem Myen hpyen n gun (100) daram gaw, Gawkngu Yang kawn Banggaw mare hku shamu shamawt shang wa nhtawm, Nam Mak Zup kaw hkring nga ai aten hta KIA hpyen hpung ni sa htim gap ai kawn gasat poi byin ai re lam, shawng lam na lit nga ai salang ni shana wa ai kaw na chye lu ai.
January shata 18 ya shana maga hkying 2:30pm aten hta mung, KIA Masat (8) Dap Ba ginra, Mo Da Ji (မိုးဒါးႀကီး) kaw, lawu mung kawn lung wa ai Gumshem Myen Hpyen Jet Fighter nbung li (2) hte bawm lahkawng lang wa da bat jahkrat bun ai lam mung nga ai re.
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra hta mung, Kokang MNDAA ni nga ai, Man Chyawk ntsa grup yin shara ni hta Jet Fighter nbung li (1) hte bawm lahkawng wa jahkrat bun ai lam chye lu ai.
