Galeng mare makau na lamu ga hpe Banglaw mare masha ni kashun madu wa ai amu manghkang hpe lit nga ai salang ni hparan jasan

Mungmyit Sinli Ga (Kachin Sub-state) Nampaka Ginwang, Galeng Ginwang Daw, Galeng makau na lamu ga hpe Banglaw mare masha ni kashun madu wa ai hpe Banglaw mare komiti salang ni hte Galeng ginwang daw na lit nga ai salang ni, January shata 18 ya shani hparan jasan la lu sai lam, manghkang kaw hparan lawm ai salang langai shana wa ai.

Ndai shara gaw Galeng ni a lamu ga rai nna, ျပည္သူ ့စစ္ ni dap jung shara jahkrat nga ai hpe KIA ni padang dip da ai shara re, dai hpe Banglaw mare masha ni numdaw (1) lang sa hkyen wa ai majaw, n gup aga hte nhkyen na matu tsun nhtang kau sai, dai hpang numdaw (2) lang ngu na bai sa hkyen wa ai hpe mung Galeng mare salang wa a nta kaw shaga la nhtawm, shanhte a mare komiti salang ni hpe shaga la nna, hpang kalang bai nhkyen na matu tsun shangut hkat nna, shanhte mung ga sadi hkam mat wa sai re raitim, numdaw (3) lang ngu na hta gaw masha n gun (96) hte bai sa hkyen wa ai majaw, yawng hpe Galeng gat kaw rim mahkawng da nna, mare komiti salang, ram ningbaw zawn re ni hpe shaga shaw la nna, gadai shangun ai ngu hpe san jep ai lam galaw ai hta ntsun hkraw ai majaw, lata du sharin shaga ai lam hpe galaw ai, dai hpang she shanhte a ginwang daw du madang salang Yai Chyet (Nandaw) shangun ai nga nna shanhte tsun wa ai hpe salang wa tsun ai.

Numdaw (3) lang ngu na bai sa hkyen ai hta sha mu, hpun (150) jan, kawa wahpang (80) jan kran kau ai re majaw, ahkyak la ai hku gumhpraw sen 5,000,000 kyats, shawa ai hta shanhte hku nna, gumhpraw sen 1,500,000 kyats hte Nga dumsu langai jaw na nga ga sadi hkam la sai.

Rai yang gumhpraw hte Nga hpe jaw nna, shahte a mara hpe yin la hkam la na matu lahkawng masum lang shaga ai raitim, nsa ai majaw hpang jahtum gumhpraw hte Nga hpe ntsun sai sha, mare komiti salang ni sakse tai ai hte cycle hpe atsawm sha ap dat ya sai, lamu ga hpe gaw shanhte a lata de tsep kawp ap ya ai lam nnga ai nga nna, salang wa matut tsun ai.

Ndai lamu ga madu gaw Galeng mare masha ni na re majaw, shanhte hpe bai ap ya na matu myit hkrum tawn da ai aten hta ya na zawn manghkang byin wa ai re lam chye lu ai.

Mungmyit Sinli Ga ginra hta ya na zawn lamu ga manghkang ni law law byin ai lam nga ai hta ninghtawn madang hku hparan ai lam, ginwang daw komiti hku hparan ai lam ni nga ai raitim, ndai lang na Galeng lamu ga manghkang gaw kaba dik ai re lam chye lu ai.