Gumshem Myen hpyen la hte arung rai htaw lung wa ai modo hpung ni hpe KIA ni hkap gap gasat
Lawu ga na lung wa ai gumshem Myen hpyen la hte hpyen arung arai htaw lung wa ai modo hpung ni hpe January shata 28 ya shani hkying 11:30am aten hta KIA Masat (8) Dap Ba, Masat (35) Dap Dung ginra, Hu Pin lahta Kung Tan Ji kaw KIA ni bawm hte hkap gap gasat ai lam chye lu ai.
KIA Masat (8) Dap Ba ginra hta sha, gumshem Myen hpyen la hte arung arai htaw ai modo (34) hpung ni hpe January shata 27 ya jahpawt hkying 8:00am aten hta Pin Tin Mare lahta kaw numdaw kalang, hkying 10:30am aten hta Pin Tin Mare lawu kaw numdaw lahkawng lang KIA ni hkap gap gasat ai.
Matut nna jahpawt hkying 8:18am aten hta mung, Meza Nante kawn Jinghpaw de lung wa ai gumshem Myen hpyen la hte hpyen arung arai htaw ai modo (40) hpung ni hpe Pin We hte Pin Tin lapran kaw KIA hpyen hpung ni bawm hte hkap gap gasat ai lam nga ai.
Mungmyit Sinli Ga (Kachin Sub-state), KIA Masat (10) Dap Ba, Masat (17) Dap Dung ginra, Kokang MNDAA hpyen hpung ni nga ai, Man Mak makau Hpa Hping hte Mung Yaw makau Mung Het kaw January shata 28 ya shani gumshem Myen hpyen ni Jet Fighter nbung li (2) hte wa gap gasat ai lam, shawng lam hpyen shisawk ni shana wa ai kaw na chye lu ai.
