61 ning hpring rawt malan masat ninghtoi hpawng galaw
61 ning hpring rawt malan masat ninghtoi hpawng hpe February shata praw 5 ya jahpawt hkying 8:00am aten hta Laiza Muklum Sinpraw Majoi Manau Gawknu kaw galaw ai.
Masat ninghtoi hpawng hta KIO, KIA ningbaw kaba Nban La a shatsam mungga hpe Wunpawng Mungdan Shanglawt Hpung, Ninggawn Amu Madu Salang Kaba Kumhtat Hting Nan kaw nna, hti shalai ai.
Wunpawng Mungdan Shanglawt Hpung Ginjaw Komiti Tingnyang Up Malai, Wunpawng Mungdan Shanglawt Hpyen Dap, Dap Awn Daju, Du Daju Jum Gunhtang Gamshawng kaw nna mung, hpung jat shatsam mungga hpe ya na zawn tsun ai.
Ya dai ni myit taw nga, garu taw nga, ya man pa ten hta e anhte pandung 3 re ai. Hpyen gumshem lailen hpe pawt hte nawng ru hte brawng a grawp kau shamyit kau na re, 2008 gawda tara gaw anhte a matu akyu nnga ai Myen hpyen dap a matu ka la ai rai nna, Myen hpyen dap galoi nga yang galoi ahkaw ahkang zing mai ai re dai majaw ndai hpe ashep kabai kau ga. Federal Democracy mungdan gaw gap lu hkra ngu ai re.
Anhte a mungmasa hpe laknak lang ai rawt malan majan masing de sa wa ai raitim, gap hkat jahkring nna mungmasa chyinghka hpaw wa shagu tsun ai raitim, mungmasa n gale ai dai majaw ningbaw kaba a mungga hta anhte ntsun yu ai nrai sai, gap hkat jahkring na tsun yu sai, 17 ning tup mung la yu saga ai, mungmasa de galoi n du ai dai hku na shanhte masu chyu masu kau ai.
Ninggawn daju kata na magam gun ladaw 50, 40, 30, 20, 10 ning hte 5 ning ladu hkrum amyu shayi magam ni hpe shagrau lakmat jaw ai rai nna, 50 ning hpring magam gun ni hpe gaw ja dak kama dazik hte shagrau ai lam galaw ai. Ndai lamang hpe Dap Ba, Dap Dung shagu hta mung shagrau sha-a lamang ni galaw ai lam chye lu ai.
National Union Garverment (NUG) Asuya, Jinghku rawt malan wuhpung ni rai nga ai PSLF/TNLA, ULA/AA, MNTJP/MMDAA dingdung dap hpawm 3 hte Chin National Front (CNF) rawt malan hpung ni kaw nna shagun laika ni hpe hti ai lam galaw ai.
61 ning hpring rawt malan masat ninghtoi hpawng lamang hpe mungdan kata shara shagu hte maigan du Wunpawng myu sha ni mung galaw ai hpe chye lu ai.
Wunpawng mungdan shanglawt hpyen dap hpe lai wa sai 1961 ning, February shata praw 5 ya shani hpaw hpang dat ai rai nna, 2022 ning, February shata praw 5 ya shani hta 61 ning hpring 62 lang na rawt malan marat ninghtoi rai nga ai.
