KIA Masat (7) Dap Dung ginra hta gasat gala majan byin
KIA Masat (1) Dap Ba, Masat (7) Dap Dung ginra hta February shata 18 ya shana maga hkying 2:20-4:30pm aten laman Shing Kap Bum post kaw nna, pru wa ai gumshem Myen hpyen hpung ni hte KIA ni gasat gala majan byin ai lam chye lu ai.
Shing Kap Bum post kaw na pru wa ai Myen hpyen la marai 8 hpe dap shinggan hta KIA ni hkap gap ai kawn gasat gala majan byin wa ai rai nna, hkying 6:10pm aten laman hta KIA hpyen hpung ni kalang bai sa gap ai lam chye lu ai.
February shata 15 ya shani hta mung KIA Masat (7) Dap Dung ginra, Hpak Ma mare lup wa kawng kaw gumshem Myen hpyen dap Hk.L.Y (137) dap ni hte KIA hpyen hpung ni gasat gala majan byin ai lam nga ai.
Gumshem Myen hpyen ni gaw mare kata de shang nhtawm, sinat majoi gap shadam ai majaw mare masha ni hkrit tsang nna, shim lum ai shara de hprawng yen nga ai ten, Hpak Ma mare na Slg. Ar Hkyi Zi Ba (အာခီဇီဘာ) hte shi a ningrum ningtau jan Li Ja Dwi (လီဂျာဒွေ့) yan la mung cycle hte pru wa ai kaw gap sat hkrum ai lam byin lai sai re.
KIA Masat (3) Dap Ba, Masat (15) Dap Dung ginra, Manmaw kawn Nmawk de cycle hte lai lung wa ai Nmawk Chyenan lawk na Salang Gawlu La Awng hte Salang Kareng Hting Nan yan hpe February shata 18 ya shana hkying 10:30pm ten gumshem Myen hpyen dap Hk.M.Y (437) shawng hku lai wa yang, dap kata kaw na gap dat ai majaw, lahkawng yan asak si sum mat ai hpang, Nmawk ga lajang gawk kaw tawn da ai lam chye lu ai.
February shata 17 ya shani hta mung KIA Masat (15) Dap Dung ginra, Wa Wang Mare Lung Ja Bum lawu kaw gumshem Myen hpyen dap Hk.M.Y (301) hte Hk.M.Y (437) dap na pawng hpawm hpyen hpung ni KIA hpyen hpun ni gasat gala majan byin lai sai hpe chye lu ai.
