Shing Kap Bum hta gasat gala majan matut byin

KIA Masat (1) Dap Ba, Masat (7) Dap Dung ginra hta February shata 20 ya shana maga hkying 5:00pm aten Shing Kap Bum kaw KIA hte gumshem Myen hpyen dap ni gasat gala majan matut byin ai lam chye lu ai.

Hk.L.Y (137) hte Hk.L.Y (46) ni nga ai Shing Kap Bum post hpe KIA ni sa gap ai kaw na gasat gala majan byin wa ai rai nna, February shata praw kaw nna, Shing Kap Bum mayan hta gasat gala majan matut byin nga ai lam chye lu ai.

Ndai zawn gasat gala majan matut byin nga ai hta February (19) ya shani hkying 11:00am aten daram hta mung Masat (7) Dap Dung ginra, rai nga ai Putao ginwang, SumPyi Yang ginra, Ntsi Yang mare baw, Shing Kap Bum mayan kaw gumshem Myen hpyen dap hte KIA ni gasat gala majan byin ai lam nga ai.

February shata (19) ya shana hkying 7:30pm aten daram hta mung Hpankat, Aye Mya Ta Ya lawk, Hpakant balik dap hte gumshem Myen hpyenla ni kawn nta shagu ngu na hte lai sa lai wa mungmasha ni hpe lam pat da nna, jep joi ai lam ni galaw nga ai hpe chye lu ai.