KIA Dap Dung (7) ginra hta gumshem Myen hpyen ni Jet Fighter (2) hte wa htim gap
KIA Masat (1) Dap Ba, Masat (7) Dap Dung ginra, Lungsha Yang hte Tan Ja mare lapran kaw February shata 22 ya jahpawt hkying 6:10am aten daram hta gumshem Myen hpyen hpung ni hpe KIA hte PDF hpyen hpung ni gasat gala majan byin ai lam chye lu ai.
Gumshem Myen hpyen hpung ni Putao maga na shamu shamawt yu ai hpe KIA hte PDF pawng hpawm hpyen hpung ni hkap gap ai kawn gasat poi byin ai re lam chye lu ai.
Gasat poi byin ai shara hte Shingkap Bum mayan hta gumshem Myen hpyen ni Jet Fighter nbung li 2 hte jahpawt hkying 10:30am aten daram kaw nna wa htim gap gasat ai lam nga ai re.
Gumshem Myen hpyen ni hpyen nbung li hte wa htim gasat ai hta mungmasha ni kaw hkra hkala ai lam nnga ai raitim, Lungsha Yang hte Tan Ja mare hkan na mungshawa ni hkrit tsang nna, nam maling de hprawng koi yen nga ai lam, ginra masha ni kaw na chye lu ai.
Gumshem Myen hpyen ni shara la nga ai Shingkap Bum hpe February shata 18 ya shani kaw nna, KIA hte PDF pawng hpawm hpyen hpung ni sa htim gap gasat ai 5 ya rai sai hpe mung chye lu ai.
