Wunpawng ramma numsha hpe nhkyi hte madi nhtawm cycle kashun mat wa
Mungmyit Sinli Ga (Kachin Sub-state), Muse Kawng Mu Lwi lawk kaw February shata 26 ya shana maga hkying 4:00pm aten daram hta kadai re nchye ai la langai Wunpawng numsha hpe nhkyi hte madi nhtawm, cycle kashun mat wa ya ai lam chye lu ai.
“Ndai numsha gaw, Muse Kawng Mu Lwi lawk kaw gawk shap nna nga ai re. Shi gaw gat seng kaw bungli galaw ai, seng madu ni mung mana de gaw jau wa shangun ai aten hta lam lapran e byin ai rai nga ai” nga nna salang langai tsun dan ai.
Masha hpe adup abyen ai lam gaw nnga ai makau grup yin de mada yu tim kadai hpe mung nmu gari tsap nga yang, numsha hpe htu kanawng kau nna, Muse maga de cycle gawt hprawng mat wa ya ai, ndai numsha gaw Manmaw maga de na re lam salang wa matut tsun ai.
Ndai February shata Miwa amyusha ni a shaning ningnan (Gaunyen) aten laman hta sha Muse Kawng Mu Lwi lawk kaw gumhpraw sumbu manghkang mung byin lai sai rai nna, 2021 ning December shata hta mung shawng de modo gawt pat hpang de mung modo gau pat di nhtawm, gumhpraw shagyeng hpyi ai lam byin lai sai lam, buga masha ni tsun ai.
Ya na zawn mya lu mya sha manghkang hta seng ang ai Myen Balik Dap de sa tsun dan ai raitim, lit la hparan ya ai nnga kadai hpe kamhpa na asuya mung nnga ai majaw, gara de sha sa na mung hkrit maja let hkawm sa ra ai lam, buga masha nit sun ai kaw na chye lu ai.
