KIA Masat (27) Dap Dung ginra hta gumshem Myen hpyen hte KIA gasat gala majan byin
Sinpraw Ginwang Ginjaw, KIA Masat (3) Dap Ba, Masat (27) Dap Dung ginra, Laika Mare htum pa, Hka La Hka mahkrai kaw, March shata praw 8 ya jahpawt hkying 8:00am aten daram hta gumshem Myen hpyen dap a hpyen lang arung arai hte malu masha htaw ai modo langai hpe KIA ni hkap gap gasat dat ai lam chye lu ai.
“Si hkala tup hkrak n chye lu shi ai raitim, modo gaw dai shara kaw naw dung nga ai, mungshawa ni kaw na ma ja magra woi lang ai modo rai na masa nga ai” nga nna shawng lam na lit nga ai salang langai tsun ai.
Dai hpawt hkying 10:05am aten kaw nna, hkying 10:35am aten du hkra, gumshem Myen hpyen dap, Dapnu (88) hte Hk.L.Y (121) dap na pawng hpawm n gun (130) daram hpyen hpung ni hte KIA hpyen hpung ni, Laika Mare lahta kadawng baw kaw gasat poi matut byin ai lam nga ai.
“Ndai gumshem Myen hpyen hpung ni gaw, March shata praw 6 ya shani Munghkawng dap kaw du shang wa ai hpyen hpung ni hte mi nga ai hpyen hpung ni gayau kaya rai ma ai, Maji Gung Byuha dung ai de lung ai ten, anhte kaw na ni hkap gap gasat dat ai re” nga nna salang wa tsun ai.
Gumshem Myen hpyen nkau gaw, Maji Gung hpyen dap de du shang ai lam nga sai nkau gaw lam lapran hta naw re, lahkawng maga naw sin hkat taw nga ai, nga nna salang wa matut tsun ai.
Gasat gala majan byin ai majaw, Laika Mare na mungmasha ni Munghkawng Mare de hprawng yen nga ai rai nna, Laika Mare hte makau grup yin hkan na mare kahtawng ni gaw, lai wa sai 2013 ning October shata hta hpyen majan a majaw, Manmaw hte Munghkawng mare de hpyen koi yen nga ai lam chye lu ai.
