Munghkawng Hpyen Dap de, hpyen n gun (100) jan jat lung wa ai gumshem Myen hpyen hpung hpe KIA ni bawm hte hkap gap gasat
KIA Masat (3) Dap Ba, Masat (27) Dap Dung ginra, Han Htet maga na Munghkawng hpyen dap de n gun (100) jan jat lung wa ai gumshem Myen Hpyen Dap, Dapnu (88), Hk.L.Y (121) dap hte Hk.L.Y (15) dap na pawng hpawm n gun (100) jan hpe March shata 26 ya shani, shara lahkawng kaw KIA ni bawm hte hkap gap gasat ai lam chye lu ai.
Dai hpawt hkying 9:00am aten hta Munghkawng maga lung wa ai lam, Nat Gyi Tsin shara hta hpyen modo langai hte gale wa ai kaw kalang hkap gap nhtawm, hkying 9:40am aten hta lagaw lam hte lung wa ai hpe numdaw lahkawng lang ngu na, mi hkap ai shara hte kade ntsan ai kaw bawm (3) hte bai hkap kapaw bun ai re lam, shawng lam hpyen shi sawk salang langai tsun ai.
Bawm hte hkap gap gasat ai hta modo gawt ai wa dai shara kaw si mat ai, lagaw lam hte re ai kaw na mung marai (2) si nhtawm, marai (5) gaw hkala nna Manmaw de htaw yu wa sai lam, salang wa matut tsun ai.
Mungmyit Sinli Ga (Kachin Sub-state), KIA Masat (6) Dap Ba, Masat (36) ginra hta mung, gumshem Myen Hpyen Dap Hk.L.Y (355) dap na hpyen hpung ni Shwi Zin Wan maga de shamu shamawt lung wa sai majaw, gasat gala majan byin wa mai ai lam, hpyen shi sawk ni kaw na chye lu ai.
Ndai gumshem Myen hpyen ni hte March shata 22 ya shani hta Namhkawng bum mayan kaw KIA Masat (36) hpyen hpung ni hte gasat gala majan byin ai lam nga sai re.
