KIA Masat (27) Dap Dung ginra hta gasat gala majan byin
KIA Masat (3) Dap Ba, Masat (27) Dap Dung ginra, Zup Ja mare lahta kaw March shata 28 ya shana maga hkying 3:40pm aten daram hta gumshem Myen hpyen ni hte KIA ni gasat gala majan byin ai lam chye lu ai.
Gumshem Myen hpyen dap, Dapnu (88), Hk.L.Y (121) dap hte Hk.L.Y (15) dap na pawng hpawm n gun (160) daram hpung ni gaw, Munghkawng dap kaw na Maji Gung hpyen dap de, hpyen lang arung arai hte malu masha wa sa ai hpyen hpung ni hpe hkap gap gasat ai re lam, shawng lam hpyen shi sawk salang ni shana wa ai.
Ndai gumshem Myen hpyen hpung ni hte sha March shata 26 ya shani Han Htet maga na Munghkawng hpyen dap de lung wa ai ten, KIA ni Nat Gyi Tsin shara hte dai makau kaw bawm hte hkap gap gasat ai lam nga ai re.
Manmaw Hpangga Kawng makau kaw dap jung ai Hk.L.Y (47) dap makau na Amyawk Dap hte Nmawk kaw dap jung ai Hk.M.Y (437) dap ni mung, March shata 28 ya shana maga hkying 4:30pm aten daram hta laknak kaba (7) lang gap shadam bun ai lam mung nga ai.
Laknak kaba si wa hkrat ai shara gaw, Masat (1) Dap Dung ginra, Wabaw mare hte Mai Ja mare makau, Masat (15) Dap Dung ginra, Lung Ja Bum mayan hkan wa hkrat kapaw ai lam chye lu ai.
March shata 28 ya shani hta sha, Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Mungbaw Mannawng Kawng ntsa kaw KIA ni nga ai shara de, gumshem Myen hpyen ni shamu shamawt shang wa ai majaw, bawm hte hkap gap gasat ai lam, ginra shi sawk ni kaw na chye lu ai.
