Hkairem hpaji sharin jawng, jawng yu hpawng galaw
KIO, Ginjaw Ginra, Ginwang Ginjaw, Alen Bum hta sharin ya nga ai 2021-2022 hpaji ladaw masat yan 8 hkairem hpaji sharin jawng, jawng yu hpawng hpe March shata 31 ya jahpawt hkying 9:00am aten hta Hkru Kat Gawknu kaw galaw la lu sai lam chye lu ai.
Dai ni jawng yu ai hta masat yan 8 lahta tsang hkrairem (Diploma) jawngma marai (12) rai nna, masat yan (19) ningpawt ninghpang hkairem jawngma marai (13) hpe kapyawn nna jawng yu lekmat shagrau, jawng yu la lu sai.
Jawng yu mat wa na jawngma ni hpe numhtet numra mungga hpe (Hk.R.J Jawng Up & Hk.R.D Lit Hkam) Srkb. Kareng Brang Seng tsun ai hta “Ya dai ni jawng yu lekmat hte jan mau hkam la na nanhte ningpawt ninghpang madang marai 13 hte lahta tsang Diploma marai 12 yawng marai 25 hpe hkairem jawng kaw nna, Karai Kasang a man e mung, mungchying mungshawa a man e sakse tawn let dai ni kaw nna hkairem sara/num ni masat dat sai” nga tsun ai.
Matut nna hpaji jaw shatsam mungga hpe (K.I.C Amu Madu hte Hkai Rem Jawng woi awn komiti Salang) DuKaba Lahpai Zau Raw shaga ai hta
“Shinggyim masha prat pra sa wa ai kaw na hkailu hkaisha remlu remsha ai ni hkrai re. Lai sai ten hta anhte Wunpawng myusha ni htung hkying hku nna galawlu galawsha lai wa saga ai. Anhte Wunpawng Mungdan gaw lahkam mi galaw yang lalam mi lu sha ai lamu ga re, hkairem jawng a lam dai ni anhte grai naw nyem nga ai, dai ni mungkan hta galu kaba nga ai mungdan ni gaw hkailu hkaisha remlu remsha bumgli hpe prat dep ai jak hpan amyu myu hte gunrai galaw shapraw ginlen lu sha nga ma ai, Wunpawng myu sha ni hkailu hkaisha hpe npawt da hpran la nna, prat dep ai mungdan gaw gap sa wa na ginjang langai mi re” nga nna tsun ai.
Lahta tsang hkairem jawng hpe 3 ning lung ra nhtawm, tsang 10 awng boi lu ai ni rai ra na hte ningpawt ninghpang hkairem jawng hpe gaw shata 10 lung ai hta jawng tsang 8 kaw nna tsang 10 lung ga ai ni rai ra na lam chye lu ai.
