Mai Ja Yang Institute of Education (MIEd) Janmau shagrau jawng yu hpawng galaw
Wunpawng Mungdan Shanglawt Asuya kaw nna hpaw sharin ya nga ai Mai Ja Yang Institute of Education (MIEd) a janmau shagrau jawng yu hpawng hpe April shata praw 2 ya jahpawt hkying 8:00am aten hta Mai Ja Yang Muklum Hpaji Gindai Gawknu kaw galaw ai lam chye lu ai.
Janmau shagrau hpawng hta Ginjaw Hpaji Dap Ningtau Lit Hkam Sara Kaba Malang Brang Tawng kaw na hpaji jaw shatsam mungga shaga ai hta “Anhte Wunpawng myusha ni gaw shanglawt nlu shi ai rawt malan ai aten naw re majaw, myit ra ai lam hpe ningshawng njaw byin mai ai lam hpe tatut hkrang shapraw ngu ai lashum ga hte maren grai shakut shaja sa wa na lam” tsun ai.
Janmau shagrau hkam la sai jawngma ni gaw 2019-2020 hte 2021-2022 jawng lung ladaw hta jawng lung ngut la sai Pre-College Program, Diploma in Education (Dip .Ed) program, Diploma in TESOL (Dip. TESOL) program na jawngma ni hte 2021-2022 jawng lung ladaw hta jawng ngut la sai Diploma in Teaching Chinese Language (Dip. TCL) program na jawngma yawng marai (575) re lam chye lu ai.
MIEd Jawng Up Sara Kaba Nnye La Raw tsun ai hta “Dai ni janmau shagrau hkam nga ai ni gaw hpaji hpe ninggam langai hku na hka ja la lu sai ni rai nna, hpaji lam a mai kaja ai hpe chyena hkawn hkrang sai ni rai nga sai majaw, Wunpawng mungdan a matu, hpaji hte shakut shaja sa wa ga” nga nna matut tsun ai.
MIEd jawng gaw 1998 ning hta sara hpaji sharin TTS ngu nna hpaw hpang wa ai rai nna, 2008-2003 ning kawn TTC sara shalat jawng ngu sharin sa wa ai hta 2018-2019 ning kaw na MIED ngu ninggam shatsaw sharin sa wa ai rai nna, dai ni janmau shagrau hkam la sai jawngma ni gaw (5) lang hte (6) lang na janmau shagrau lamang re lam chye lu ai.
