Masat (27) Dap Dung ginra hta gumshem Myen hpyen hte KIA ni gasat gala majan matut byin
KIA Masat (3) Dap Ba, Masat (27) Dap Dung ginra, Laika Zup Ja mare lahta Kumhpya Kawng kaw April shata praw 6 ya shani hkying 11:00am aten hta gumshem Myen hpyen hpung ni hte KIA ni gasat gala majan byin ai lam chye lu ai.
Gumshem Myen hpyen dap, Dapnu 88, Ts.K.Hk (15) hte Hk.L.Y (121) dap na pawng hpawm hpyen n gun 200 daram hte Munghkawng hpyen dap kaw nna, Maji Gung kaba de modo 4 hte hpyen lang arung arai htaw lung wa ai kaw KIA ni hkap gap gasat ai re lam chye lu ai.
Ya aten hta gumshem Myen hpyen ni shawoi na hta laklai ai hku hpyen shamu shamawt nga ai rai nna, Manmaw hpyen dap ni hta mung mungshawa jawn ai nbungli ni hta hpyen n gun htaw bang nga ai lam, hpyen shi sawk ni kaw na chye lu ai.
April shata praw 5 ya shani hta mung KIA Masat (2) Dap Ba, Masat (20) Dap Dung ginra, Lawa Lagawng Mare kaw nna Dum Bung Hka rap nhtawm, Hpa Hka Pa hku shamu shamawt pru wa ai Hk.L.Y (238) dap na hpyen n gun 60 daram hpung ni hte KIA, PDF pawng hpawm hpyen hpung ni Hkinru Pa grup yin hta gasat poi byin ai re.
