Gumshem Myen hpyen ni a hpyen lang arung arai htaw modo 2 hpe KIA ni bawm hte hkap gap gasat

KIA Masat (3) Dap Ba, Masat (27) Dap Dung ginra, Munghkawng mare hte Laika mare lapran Hkai Ring Pa kaw April shata paw 7 ya jahpawt hkying 8:30am aten hta gumshem Myen hpyen ni a hpyen lang arung arai, malu masha htaw ai modo 2 hpe KIA ni bawm hte hkap gap gasat ai lam chye lu ai.

Ndai gumshem Myen hpyen ni gaw, Munghkawng hpyen dap kaw nna, Maji Gung hpyen dap de, hpyen lang arung arai hte malu masha wa sa ai ten Hkai Ring Pa kaw anhte kaw na ni bawm hte hkap gap gasat ai hta modo langai dai shara kaw hten mat ai, dai modo hpe Munghkawng hpyen dap de bai garawt mat wa sai lam, shawng lam na lit nga ai salang langai tsun dan ai.

KIA ni gumshem Myen hpyen modo hpe hkap kapaw ai hpang, Munghkawng hpyen dap hte Zup Ja mare kaw nga ai Myen hpyen ni bawm ngoi ai maga de, sinat kaba hte hkrup mara gap shadam bun ai lam chye lu ai.