Gumshem Myen hpyen hpung ni hpe KIA ni hkap gap gasat
KIA Masat (3) Dap Ba, Masat (27) Dap Dung ginra, Han Htet mare de sa wa ai Nambai Hka mahkrai makau kaw, April shata praw 9 ya shana maga hkying 2:15pm aten hta gumshem Myen hpyen hpung ni hpe KIA ni bawm 3 hte hkap gap gasat ai lam chye lu ai.
Gumshem Myen hpyen dap Hk.L.Y (121) dap na n gun 100 daram gaw, Munghkawng hpyen dap kaw nna, Han Htet maga de lagaw lam hte yu wa ai kaw KIA ni hkap gap gasat ai re lam, shawng lam na lit nga ai salang ni tsun ai.
Bawm hte hkap gap gasat ai hta Myen hpyen marai 4 dai shara kaw nan taw nga ta sai, ndai Myen hpyen ni gaw Laika mare kaw nna, Munghkawng kaw shang nhtawm, Han Htet mare maga de shamu shamawt shang wa ai ni re lam, lit nga ai salang langai tsun dan ai.
Ya ten hta gumshem Myen hpyen ni malu masha sa ai ga baw hte Jinghpaw mung ginra nkau hta hpyen n gun, laknak n gun hte hpyen lang arung rai ni htaw mahkawng nga ding yang rai nga ai majaw, majan kaba byin na hpe mungshawa ni hkrit tsang nga ai lam, ginra shi sawk ni kaw na chye lu ai.
KIA Masat (27) Dap Dung ginra ni hta gumshem Myen hpyen ni ding yang ngu na shamu shamawt hkawm nga ai majaw, KIA ni bawm hte hkap gap gasat ai sha n ga ang katut gasat gala majan jahkring hkring byin nga ai re hpe mung chye lu ai.
