Gumshem Myen hpyen dap ni sinat kaba hkrup mara gap bun ai majaw mugshawa ni hkrit tsang nga
KIA Masat (3) Dap Ba, Masat (1) Dap Dung ginra, Man Je mare htumpa Manmaw lam kaw dap jung nga ai, gumshem Myen hpyen Dap Hk.M.Y (319) Dap hte Hk.M.Y (601) Dap lapran na sinat kaba dap kaw nna, April shata 11 ya jahpawt hkying 8:41Am aten hta 82mm ngu maram ai sinat kaba 6 lang gap shapraw dat ai lam, Manje mare masha ni tsun ai kaw na chye lu ai.
Gap shapraw ai gaw 6 lang re. Hkrat kapaw ai kaw gaw 5 lang sha ngoi ai, pala si gaw, Nam Yu Pa hkran hte Chyauhkawng nammali de wa hkrat kapaw ai, dai shara ni hta mungshawa ni galaw lu/sha shara hkan re lam, Manje mare na salang langai tsun ai.
Ndai zawn gumshem Myen hpyen ni sinat kaba hte hkrup mara gap shadam bun ai hta mungshawa ni kaw hkra hkala ai lam kaga nnga ai raitim, mungshawa ni hkrit tsang nga ai lam, salang wa matut tsun ai.
April shata praw 9 ya shani hta sha, Masat (27) Dap Dung ginra, Han Htet mare de sa wa ai Nambai Hka mahkrai makau kaw, April shata praw 9 ya shana maga hkying 2:15pm aten hta gumshem Myen hpyen hpung ni hpe KIA ni bawm 3 hte hkap gap gasat ai lam mung nga ai re.
